<<霎時感動>>

話說, 搬左入新屋住左一星期, 由於衣物不足, 時間更不足, 只好把衣服拿去磅洗。

一袋九磅衫星期六拎去洗, 星期二先夾硬搵到時間去拎, 但未有時間開封就己經要返老家搬野...

終於返到新屋, 執完一輪, 又終於可以開一開袋衫。放面的是新買的無印格仔褲, 只是看一眼, 就有不對勁的感覺。

拿上手來, 條褲細左至少一個碼... 完了... $350著左十次都唔知有無就無了... orz左一陣, 決定衝出去買返一條...

到了apm無印, 兩個發夢sales唔知我講乜, 諗住試另一個款又無size... 仲要係我話唔岩著, 佢拎過一條一樣size的俾我再試...

總之, 買唔返。

寫很好"噚", 長話短說。

Carol今日特登打電話去無印問有無貨, 仲lunch hour衝去cwb買, 更即時拎黎柴灣俾我~ 實在太感動了~

在忙碌+orz+忙碌+壓力大+搭錯車的日子中, 感受到暖意和甜味~

想快d將郭太娶回家。

<<統計一下>>

就呢一刻"記得"的結婚喜事分佈:

2010-01 x3

2010-02 x1

2010-04 x1

2010-11 x3

2011-01 x1

如果出年最後要飲十一二餐, 也不為奇。

<<裝修進度>>

尋晚去左睇一睇間屋, 油左油~ 最利害的是藍色的房間真的很藍, 看來要花一點點心思在書櫃的顏色上。理論上, 裝修工程差不多完成, 感覺其實還很不實在, 似去左人地間屋多過自己間屋咁。

黎緊星期四下午請假等人黎裝簾, 希望可以把其他傢俬都安排在那一日。如果有人果日下午得閒, 歡迎搵小弟食tea。不過, 由於門還沒有送來, 所以可能搬入去住時屋是完全"open"的~

希望聽日可以開波抹屋... 唔係的話, 又少一日用...

<<好累>>

我成日都話累, 但今次真係好累... 一個long weekend, 好似無停過咁有野發生, 可能我真係要抖一抖... 不過, 生活似乎不容許。

三日假期, 單項計做左超過十個tasks, 第一日shopping, 都叫順利, 福音聚餐也完成了; 第二日做了五件大事, 時間會過去, 即使你不情願, 每件事都總算過去了, 但感覺沒有一件做得好, 難受的感受漫延至第三天; 第三天去了郊遊, 為的是放下心情, 讓自己relax一下, 塔門之旅是有果效的, 再上了最後一課Jworkshop, 很累...

今日, 回到office, 忘記了今天要開會, causal wear了... projects 好似唔記得晒要做咩... 吃力...

<<你愛自己的樂器嗎？>>

今天晚上，遲了一點點放工，冒雨等著討厭的118，上到

車迫得死去活來，經過半小時的腰腿鍛練，趕到了，JWORKSHOP，今天是第三課，有恭碩良，繼續有JOHNNY。疲倦的身軀，不幸的交通已經不是第一次，是第三次，對，次次如是，第一堂更是彌敦道撞車，結果由油麻地趕到大角咀。

恭碩良講鼓，講音樂，有趣，有道理。加上令人嘆為觀止的DEMO，實在叫樂手難以不心動。而事實上，一起去的隊員相信都會有同感，而且明顯的，大家對音樂更有渴求，想突破想進步。一句講，大家有團火。

今天我們的演奏，我不知道其他人有甚麼感受，我自已則是百感交集，當中最大震撼的，莫過於姊妹唱歌的突破。別誤會，不是說底底有了容祖兒的歌喉，而是我今天第一次見到姊妹真正遏力的開口去唱，我相信隊員們會同意吧。

今天到了最後一首歌，可能是因為很正的BAND，很正的MUSIC，很正的VOCAL，但我在那一首歌裏，我經歷到神，聽到神問我，你愛自己的樂器嗎？閉上眼睛禱告，樂器？甚麼樂器？結他？很爛！唱歌？都很爛！但今天神問我的問題，是我愛不愛，不是爛不爛。

這兩年，敬拜的服侍得吃力，說實在的，半死不死似的。由以前彈結他，到領唱，到學其他樂器，到硬著頭皮去編曲，自己其實走到那裏去呢？我不會否定自己曾經努力過，學習過，付出過。進步不多不少還是有一點。但，我愛這個崗位嗎？

今天的敬拜裏，我記起自己喜歡音樂，喜歡敬拜，喜歡自己的“樂器“。這個樂器，是指我獻上的音樂，那僅有的爛音樂。今天唱歌，咀唇就是我的樂器，彈結他，結他就是我的樂器，而找回的最大大件樂器，是那顆敬拜的心。

隊員們，希望我們都能在主裏，更努力學習和運用神給我們的樂器。

<<累>>

呢排好累... 好多野要煩, 好多野要攪, 好多人要顧... 今個星期打爆左, 忙唔緊要, 希望忙得有價值, 忙得開心一點。

過到重陽的話, 又攪掂多左d野, 努力努力~

<<尖頭鞋x2>>

<<不補了>>

又一個補習學生, 這個補習學生算是我補的以來較有水準的一個了, 勤力, 又乖, 唔蠢, 人工還佷高(雖然我問再加人工時被拒, 但還真的很高)。不過還是不補了。

結婚在即, 放棄了足球隊的六角賽, 放棄了補習(其實最捨不得的是那份錢)。但還是會打籃球比賽, 會上JWorkshop, 會選執事。

現階段較大的task是新居裝修, 當日流程和invitation。再努力一點。

<<半天假>>

<<有果句講果句...的話>>

如果做人真係可以有果句講果句... （聲明，我想講的對象係多於六個人）

第一句想講係，可唔可以話我知我隊友係邊個？
第二句想講係，可唔可以話我知正選有邊個？
第三句想講係，球証吹得嚴唔係用“係咪都吹“黎練的。
第四句，如果三球波俾你，你接唔到，可以話我錯，如果到十球接唔到，都仲可能全部都係我錯，但如果KEEP住接唔到，係咪應該諗下會唔會自已有“少少可能“有問題，而唔係下下都好似自已無辜同人地做錯呢？
第五句，如果真係志在WIN，早D講，志在FUN，都早D講，唔好一日到黑話點抽點抽，幾多隊，因為無論幾多隊，想WIN都係WIN晒佢，想FUN都係玩晒佢。而唔係話WIN唔到幾多場，就FOR FUN ONLY，好核突。
第六句，如果叫人出多D聲，人地出聲提你，你要聽。

最後，無講出黎，同自已講左六句...

第一句，又係個個都覺得無問題，咁我都無問題了，這是我生存之道，可以算作順服和捨己嗎？
第二句，繼續努力。
第三句，好彩我唔會累到抽筋，因為今日無停過咁打兩個鐘，雖然唔知做緊乜。
第四句，我好想真係打波。
第五句，仲有五分鐘走得...

當聽到輸頭兩場，之後輸晒都無所謂之後，我同自己講，原來我仲有火。

<<游水>>

昨晚只游了半個鐘, 約1km, 因為未落水己經好累...orz

200 四式
100 蛙
100 自
6x50 蛙 (on 1'20)
6x50 自 (on 1'10) << 第五個的後25m... 我慢過Carol....
走人

Well-Planned

呢排, 印象中, 好似先後有唔同朋友同我講話覺得我個人well-planned...

上一句的"..."係因為通常聽到都會有一番感慨... 如果我真係咁well-planned, 我就唔係而家咁啦...

而且我又會回想起好多時同d朋友傾下自己d 所謂planning... 可能係我敏感啦, 似乎大家的嘴臉都唔太supportive... 又或者覺得我都係得個講字, 又或者覺得我多餘...

其實我自己都覺得, 如果人生係咁易plan到, 呢個世界少好多煩惱啦...

<<溝女 - 二>>

似乎上次講的溝女, Carol呢排見到真人版, 亦完全驗証了我之前raise的concern~ 詳細情況唔講, 但唔識叫餸, 價錢太貴, 唔知食乜似乎都出現左~ 所以男仔們, 同女仔食飯時, 去邊度食真的要三思...

同Carol講講下, 又諗左一d野, 就係到底男仔應該點約女仔食飯呢? 或者講, 點可以減少食檸檬的機會呢?

咁講啦, 第一個問題要諗的是, 鋼鍊同麥提爽都有教過的, "等價交換", 你約人出黎, 人地有乜著數先? 呢樣著數, 唔係話餐飯男的俾錢, 因為而家d女仔有錢過d男仔, 睇下用乜牌子野就知啦~ 而係個女仔出黎食飯, 都要餐飯"吸引", 又或者"有個口號"。

餐飯點為止吸引呢? 可能去食一間出名的餐廳, 可能個女仔覺得同你食飯吹水係開心的, 咁到底乜先令個女仔覺得係吸引之處, 就真係要個男仔自己諗下或者估下喇, 估得中, 咪有機會食到囉, 估唔中, 下次再估過啦。

咁點為止"有個口號"呢? 就係為餐飯加d噱頭, 最正路的, 咪同人慶生日囉。如果講野夠叻, 可能同自己慶生日都得~ 至於話唔開心搵人陪下呢d, 都係口號, 但個人就極唔主張男仔扮唔開心約女仔, 好似好賤格咁。但真係唔開心的話, 都可以試下o既... 不過要小心揀對象囉...

<<兩程小巴>>

前天晚上放工, 在東區醫院往柴灣地鐵站的小巴上, 看見一對疑似大陸來港夫婦, 女的腹大便便, 男的正嘗試在八達通機上找錢孔投幣。開車後, 女的用不鹹不淡的廣東話問司機, 最近的酒店在那裏。司機想了想, 回答說北角, 婦人問, 那麼她應該在那裏下車...

昨天晚上放工, 在明愛醫院往長沙灣地鐵站的小巴上, 途中一位女仕把疑似她媽媽的女人扶上小巴, 當時小巴只剩下一個座位, 媽媽坐好後, 女仕便下車, 又吩咐媽媽自己先回家, 而她自己則會步行回去... 那媽媽就坐在隔離, 餘下的車程都嚷著說攪錯, 不斷的說攪錯...

世界上很多事情, 都叫自己無言以對。

<<送給這陣子不開心的朋友們>>

<<呢排>>

架車整返, 個pat靚過塊面。

同Carol, 老小姐, 維維去左海港打邊爐, 宵夜價每位$110, 幾好食。

想買相機, 但仲諗緊邊部, 都係考慮Canon.

同天欣食左一餐約左好耐都約唔成的飯, 傾足兩個鐘, 但唔記得請佢當生日飯。

我想買的air max仍然落唔到手。

多左波打, 亦多左會開, 但都係教會的會多。

就快收樓, 好多野要諗定, 裝修呀, 傢俬呀, 屈朋友送乜呀...

朋友的感情事, 好睇過電視劇, 以為網上情緣好童話, 之後來個女人接受苦等的男人, 無言。

多左去cafe睇漫畫, 很享受的時間。

Eddie and Yan 就搬, 就如Friends所講, 這是"一個時代的終結"。

<<溝女>>

無睇錯, 係講溝女。唔係我想溝女, 係Carol尋晚食飯問我, 攪到我又諗一大餐, 不信大家可以搵佢當面對質, 但就我所知, 佢己經急不及待問左其他男仔...

Carol問我如果去溝女, 會唔會約女仔去"好d的地方"食飯, 同埋會唔會請個女仔, 我話"唔會+唔會", 之後當然引來更多追問, 但我還是覺得: "唔會+唔會"。初時我真係諗唔到原因, 諗諗下又好似有d理由出到黎...

第一個理由係, 我根本唔識d乜野好地方... Yup, I am a cheap person... 你問我去邊食好, 我會答你女人街翠苑... 一陣真係去d高級餐廳, 攪到自己醜態百出, 不是更糟? 叫酒又唔識, 叫海鮮又唔識, 埋單找數俾個女仔見到我肉赤, 不是把自己的機會送走嗎?

第二個理由係, 溝女, 真係溝溝就算咩... 都要諗長遠的, 我覺得早d俾人睇到自己本身係點好過扮晒野啦。唔扮野, 做自己嘛。再講, 我覺得AA制某程度上係一個邀請, 講緊下次再一齊出黎玩... OKOK, I am a cheap person... 但如果一黎就請個女仔食一餐, 個女仔不會覺得個男仔"太揚"嗎?

其實仲有好多理由, 不過我講多一個就算, 男仔朋友們, 問心, 你地真係咁有信心單挑一個心儀的女仔一餐飯嗎? 我就真係無乜信心喇... 大家唔好睇電視睇得多就以為一男一女去食飯, 會好幽默, 會好愉快... 如果無乜準備, dead air dead到你訓係度呀... 勇字行頭咁約個女仔出黎食街, 出到黎無野傾, 一傾對面就無興趣, 自己講笑話對面又唔識笑... 三思呀兄弟。

呢個post, 絕對歡迎留言討論~

<<人在中環>>

屈指一數, 原來睇左"人在中環"兩年了, 在web2.0的世代中, 睇一個blog兩年不是那麼困難, 但我一直沒有un-subscribe到, 因為我覺得有睇的價值。

一年前, 書展中買了CK的"人在中環2", 不過最後, 我今個月才睇。

一篇篇的blog, 不算難睇, 看了不到一星期便看完, 你說很好看嗎, 我又覺得不是, 但我會被吸引到去睇完佢... 好多書, 我好快會放棄。我都諗左一陣, 到底係乜野吸引到我睇完本書呢? 我諗, 係因為CK有自己的一套理論。

吸引在於, 我可以去睇屬於人地的一套理論, 你可以睇下人地點諗野, 同自己同定唔同, 係咪有野學。

最近睇緊幾個blog, 都幾有趣, 得閒可以跟大家分享下~

First Presentation to External Party

Today, I have my first time presentation to external parties. Though the scale is surely small and only 3 audience, I think I did quite well at least I know about I am doing totally. Explaining the workflow, answering those question, listening to people's response, I know all 'why' and 'how'.

Tomorrow I will do the same presentation to a vendor company. Wish me good luck.

Can You Hear Me? I Can't Hear You Too!

呢排其中一樣令我明顯辛苦左的事, 就係每句說話要講兩次... 對Carol係, 對同事係, 對朋友都係... 好辛苦, 完全有唔想講野的感覺, 其中一個好大的原因係, 有好多野講第二次就無左個價值...

有見及此, 我很留意著自己說話的狀況, 但我不覺得自己說話細聲了... 定係其實不嬲都係無人聽到我講野, 只不過呢排多人話我知?

另一方面, 其實我呢排都成日聽唔到人講野, 成日要估對方講乜... 對Carol係, 對同事係, 對朋友都係... 好辛苦, 加埋人地聽唔到我講野, 有放棄用語言同人溝通的衝動, 我都係做返我的電車男算啦不如...

有見及此, 我開始睇埋人個口的動作, 希望有少少幫助... 結果係無用, 因為原來大家講野都好快... 唔通我患弱聽了...

我懷疑導致我越黎越聾啞的原因有:
1. 香港嘈左... 係條街度真係乜都聽唔到...
2. 聽得耳筒多左... 日日都有30分鐘以上...
3. 我唔專心左... 成日都諗緊野...

<<游水>>

昨晚去了游水, 很熱很熱, 完全係一路游一路出汗。以下是昨晚大概的program, 維維可以參考一下。

200 四式
200 蛙
200 自
8 x 50 自 (on 1"15)
200 蛙
200 自
2 x 25 自 (衝)

温馨提示: 中間的八個五十自有一定的威力, 小弟下次或許會試十個on 1"10. (當年小弟試過20 x 50 on 50sec, 老了老了...)

<<愛。莫能助>>

看到朋友因為同男朋友鬧分手, 慘得死去活來的樣子, 其實都幾無奈。其實見到呢D朋友想搵人陪, 搵人傾, 係可以理解的, 但問心果句, 對住佢地講O既野, 有幾多句係真心話呢。

唔係話對住好好朋友都唔可以講真心話, 而係有時太了解D朋友, 你又知道你講出黎其實幫唔到件事, 咁可以就的, 就只可以係吞左想講的, 婉轉咁講一D自己都覺得好難看好的supportive statements. 然後, 可能唔多唔少己經預備定第日會有一段時間做安慰的工作。

事情黎到, 會搵朋友出黎傾下, 呻下還好, 現代人多左一樣嗜好, 就係玩失踪... 唉... 你話定我知你會失踪, 咁好簡單, 唔搵你咪得囉... 唔搵你, 失踪就唔會成立喇... 不過, 我到而家所見過的, 最困難的時間失踪左... 再蒲返頭的時候, 通常個人都變得幼稚左... 然後又去製造相同的歷史...

<<心地唔好>>

颱風"天鵝"為一班恨假恨到發燒的朋友們帶來希望, 當然最後帶來左失望啦。有網友比喻"天鵝"係女人, 因為佢扭扭拎拎, 其實扭扭拎拎的, 不嬲都唔可靠架啦~ XDD

見到有朋友話擔心, 今日會考放榜, 係咪唔應該望打風呢~ 我睇完, 笑左一聲, 三號風球會多三分, 八號風球會減五分嗎? 我都知咁諗好刻薄, 但相對於考到幾多分, 入唔入得返原校, 呢個風, 太小事了吧。八號風球的話, 放榜會延遲, 其實有咩影响呢? 都係風球過後, 大家又返學校放榜, d phase1/2/3 都再延遲, 要搵學校的考生們都係公平地在濕滑的地上搶學位。在人生的回憶上加上"我放榜果日打風"而已, 但我多左一日假喎~

你地話, 我心地係咪好唔好呢...

<<康熙來了>>

近來迷上了康熙來了, 追的方法是先用電話download, 搭車時睇返。一日都睇得到一集。你話呢個節目好唔好睇呢? 又唔係話好好睇, 但又唔會令我反感, 有時真係好好笑, 有時就無咁好笑, 悶的話我睇一半都會放棄, 但呢個情況好少。

咁有咩咁好睇呢? 因為裏面好多節目以外的事情我覺得好有趣, 但又未明白... 其中一樣就係... 陳漢典係度做乜...

其實諗下點解可以乜野topic都吹到一個鐘, 就覺得呢個節目都幾利害, 佢係一至五晚晚做喎~ 口水唔乾架咩?

<<超級巨聲>>

兩個星期日的晚上都有看"超級巨聲", 而且算是特登預留時間看的, 因為想睇下香港人唱歌。節目本身都幾好睇, 因為睇到好多唱得的參賽者比賽, 不過有太多地方看起來就是不舒服...

第一樣礙眼的, 當然係個主持... 呢個大家姐都係做返自己識做的事去做啦, MC真係唔ok呀...

第二個我覺得較大的問題係節目本身牽涉太多參賽者的故事, 本來問題都唔係咁大, 睇"Somewhere got talents" 都會有, 但... 太多了... 而且做乜個個都喊到乜咁... 呢個本身唔係俾d人上去搵一百萬的節目, 好多參賽者更係學生輩, 輸左就喊, 又話係乜野夢想, 輸左個唱歌比賽就無左個夢想咁... 加埋個"小人"主持... 個節目有時真係唔知去左邊...

第三個問題... 就係評判本身, 之前六個, 尋日五個評判, 理論上評判之間有分歧是很正常的, 但為何選這班評判反而漸漸變得重要... 評判本身係音樂人, 做幕後, 我覺得佢地睇野應會比我呢d凡人睇得多, 睇得準。看了兩集, 比較不能理解側田同古老師的評分標準, 好像沒有自己的一套, 隨心的去俾分。

不過, 相對翡翠台的其他節目, 這個節目算是很好看了。

Dling

再一次跟身邊人談"dling dling issue"。先解釋一下甚麼是"dling dling issue", 這裏的dling 係指當一個異性出現在一個人面前時, 這個人有眼前一亮的感覺, 然後被呢個異性吸引住的情況。According to a friend, 發生時間不一定要是第一次見面, dling可以隨時隨地發生。

如果話dling有trigger relationship的威力, 相信無乜人會反對, 不過除左dling之外, 很多人都會有一個list。一個list左佢期望的另一半會有的特質。呢個list上的items可以抽象如上進, 具體如身高。

問題出現在當dling vs list 時, 人們會如何取捨。

有人覺得, 呢個dling係搵男女朋友必需的, 如果無dling過, 就無足夠passion去同呢個人拍拖, 無熱戀的感覺。所以dling係一個basic requirement。dling左, 拍拖, 再去figure out到底佢meet唔meet到個list, meet唔到的話, 或許會妥協, 或許會不捨的放棄, 始終, dling到自己的異性實在很有限。

有人覺得dling係一個bonus, 搵男女朋友應該係list行先, 有一個異性approach自己, 先做的係對list, pass又鍾意就開波。之後如果有dling, 就係bonus。但呢個list到底有幾準確, d item邊d 係mandatory, 邊d係desirable, 可能係draft果個人都唔sure。

睇到身邊朋友不同的故事, 其實男女朋友開唔開始到relationship, 只係一個決定... 決定跟個list 還是決定因為有dling的感覺所以拍拖, 反正做左個決定之後, 甚麼原則態度以及requirement都可以全部推返。

<<三份工>>

打左工四年, 做左三份工, 每份工都係做"programmer", 雖然話第一份工人工偏低, 但之後每一份都俾前一份多左50%人工, 人工高左, 但寫的code少左... 應驗左我大學時成日講"我第日真係唔想寫一世code"。

唔想寫code, 第一, 真係唔太鍾意debug, 尤其是係唔知佢鬧乜的bug, 攪餐死又無成功感; 第二, 性格問題, 我都係鍾意對人多過對code; 第三, 因為寫code係freshgrad都可以寫到的... 記得果陣幫中二學生補習, 佢電腦科教.NET, 而我果陣份工就係寫.NET. "中學生都做到我份工"發生左... 我比佢多的係一個degree, 一套mind-set同埋attitude...

我覺得我都叫係"好彩"的一群, 至少人工過得去, 又唔會做到pk, 有時間去玩去拍拖。同身邊朋友食飯, 都係聽佢地話份工好悶, 好唔掂, 無得救, 但又只可以繼續做, 日日返工做野, 放工返屋企坐, 都係等星期六日, 因為星期六日可以全日都坐係屋企抖。好多時我見到呢d朋友, 我都會諗... 真係咁唔ok仲做? 真係咁無彎轉? 咁你想要d乜先...

如果你話我工作路上好彩, 我會話最好彩就係三份工的senior都係肯做肯搏的人。第一個senior同我講, 話人工低唔緊要, 做兩年就夠, 乜都學晒佢, 學到人地問乜都答到, 學埋自己工作的方式, 點manage自己的task, 再學點對外, train下自己的soft-skill。第二個senior同我講, soft-skill要努力儲, soft-skill先係最值錢的, 做一百個行得走得的application都未必夠manage一單project manage得好來得eye-catching。到而家第三個senior, 叫我focus係對外, 繼續都係學呢度的businese, soft-skill同pm... 很好彩呢, 較係我想做的。

當然, 點都仲要做d唔想做的tasks, 唔通programmer真係可以少少code都唔掂咩... 咁點好呢... 努力d做囉... 唔係自己強項唔等於做唔黎, 肯唔肯做架o者...

<<台灣>>

[2009-05-14] 台北之旅 (Day5)
Originally uploaded by Christopherism

不知道出年會唔會再去。

<<碎骨>>

岩岩係細佬身上見到, 原來拗柴係可以拗到骨碎的... 諗一諗都有少少心寒的感覺, 還好自己很少受這等重傷, 如果唔係身型應該唔再係一個問題, 因為己經care唔黎~

跟住我又會諗, 點可以防止拗柴呢類好似無乜得避免的受傷? 暫時諗到的有以下, 不過如果你無乜experience過, 可能你會覺得吹水成份好重。

1. 熱身運動真係要做, 仲要做全套。
2. 鞋要岩size, 好多人興著大少少。
3. 多做拉筋/ 伸展運動。
4. 扭親少少時, 都係停一停, 抖抖先好, 繼續打好易疏忽左個問題。
5. 唔好怕"跌", 跌傷好多時小事過扭傷。
6. 如果知自己有舊患, 或者天生容易拗柴, 唔好懶, 紮多d野先好做運動, 這種"應該無事"的賭博終有一日會輸的。

<<值唔值>>

呢排的課題, 看上去係公錢錢錢錢, 實際上, 其實係一樣野, 點解先要做值... 我的世界裏面, 平野... 真係難有好野, 但貴野, 都可以唔係好... 現實中發覺原來有d野係一定係貴的, 點講都係貴, 例如車同樓, 咁點先justify去買呢野呢...

先前想買一個耳筒, 睇中左的係$800價位, 諗左三個月, 覺得值, 但無買, 因為想慳錢, 求其搵左個$230蚊的, 用左半年唔夠, 佢壞左, 無乜音色可言的半年, 整都唔想拎去整... 咁而家仲買唔買$800的呢... 好似浪費左$230在先, 買返$800感覺好差... 所以, 我仲未有耳筒用... 但$800蚊的耳筒係咪等於襟用呢... 我真係會估佢襟用d, 因為佢$800...

而家要買一層樓, 睇左十幾間左右, 開始有d明白點解d樓咁貴, 而平又唔一定等於買得... 樓市中, 平得一定有原因, 貴的亦然... 要細心去研究呢d原因, 又要量化做數字, 真係TMD痛苦。層樓年紀, 實用, 層高, 方向, 裝修, 景觀, 暗病... 當中又要分, 好好, 普通好, 麻麻... 組合出無限個可能, 要睇得多先分得好d, 但之睇過好的又會賣左... 所以, 我仲未買到樓... 但買完最後會唔會後悔, 會唔會蝕得好甘... 我真係唔想多估...

老老實實, 值唔值, 主觀佔>50%, 因為開心, 舒服, 令身邊人開心... 呢d野, 我真係唔識量化, 不過還是會有願望... 唔知換唔換得成車呢...

Sometimes... It just doesn't work as expected...

原本諗住尋晚去買樓, 睇岩傾下價就攪掂... 最後... 都係唔成功... 經agent解釋的理由, 我真的不想去深究/查明... 意義不大, 加上agent講的野, 我不嬲聽下就算... 尤其是中文連小學生程度都不如的... (你能想像你的合約見証人不懂得寫"桌", "枱", "梳" 等字嗎... 量詞這門學問就更不用談了...)

失望多少有一點, 但都係要的起心肝再搵過, 係由頭搵過, 因為連第二想買的都賣出了... 咁點好呢... 都係咁做架啦。

好多人問我會唔會考慮其他地方, 或者揀一D大路的屋苑... 唔係唔會考慮, 但唔鍾意囉... 好難解釋... 可能有一日我會好後悔揀呢度, 好後悔無揀果度... 但... 如果只係後悔住邊, 己經係小事了。

有定心理準備, 呢排心情可能會好差...

<<大學畢業生>>

大學畢業生, 即係畢左業的大學生, 呢班人一定有一個身份, 就係現在呢一刻做緊大學生的師兄師姐。呢d師兄師姐有一部份對自己"掂過", "參與過" 的團體有一百二十分歸屬感, 所以會不斷返去個團體度做"顧問"或者"嘉賓"而我由大學生到而家做左兩三年, 都係覺得, 呢班人好唔順眼......

第一個唔順眼的原因, 係呢班人好煩... 好多意見, 因為佢地會覺得自己用過果套work或者唔work, 出於好心, 一定會說服新一代參考佢地的經驗。本來成人之美係君子所為, 但呢班人因為太有歸屬感, 覺得唔可以俾事情出意外, 當佢地的意見不被採納時, 由"意見提供"變成"出言相勸", 最後分分鐘變成罵戰。

第二個唔順眼的原因, 係呢班人咁肯返黎幫手, 我硬係會覺得佢地另有目的, 你話我小心眼都無法, 可能係promote野, 可能係揀卒... 我唔知道, 但... 邊有人咁得閒/好心/熱情係大學生活架... 讀完書就係讀完書... 唔明白... 如果呢班人真係咁purely返黎幫手, 其實我仲驚... 呢班人肯定係超得閒, 無野做, 或者搵地方逃避現實/找回自我...

當日我第一次覺唔順眼, 係諮詢, 我上莊, 人地諮。一班三唔識七的人黎到, 吵吵鬧鬧, 似老賣老的怒問問題, 中間又夾雜著表揚自己當年的豐功偉績, 最後個諮詢攪通頂, 我又唔覺得真係得著d乜。上莊P仲行黎細細聲話, "捱埋個諮詢, 之後就你地世界喇", 但我印象中佢之後怒問左一個鐘問題, 仲自己provide埋model answer打圓場...

不過, 我接受到返去睇下新一代點做野, 接受到返去睇下d event, 懷緬下過去, 做下老人精, 應該又會係一番滋味。

<<型?唔型?>>

又係一個每個人都大有唔同定義的topic, 點先叫型... 型字唔同時候用會講緊唔同的事, 可以話係一件事, 可以話一個人的興趣, 可以話某類衣著, 可以係單純對一個人的感覺... 曾經在cwb街上見到不少型男型女, 講緊係佢地衣著打扮加行出黎果種"氣"; 曾經覺得一個錫老婆仔女的廿四孝男人型到令人講唔到野; 曾經去東甫寨, 見到一班基督徒去同當地人踢波, 幫人執垃圾, 成件事型到發光...

內在的型, 我會理解係講緊果個人的氣質, 一個人的氣質由一個人的思考方法, 價值觀, 性格, 嗜好, 習慣等gen出黎, 我覺得前三項較重要, 而家前三項都會某程度上影响緊後兩樣。舉例說明, 一個男人帶老婆仔女出街搭地鐵, 要打電話問同事邊度轉車, 這是一個五方面都不合格的情況... 又例如, 一個男人簡簡單單的為自己/家人/朋友打算, 努力工作/學習/計劃, 再一步步行出黎, 己經好型, 至少型過"只係換左衫的港男"。

至於外在嘛... 其實, 小弟覺得俾到人感覺自己係會"注重儀容"就己經夠了... 一個人, 留意下自己適合著d乜, 用d乜, 做返岩自己style的事, 己經俾人黎得好順眼的感覺, 要令人覺得型, 都係靠內在啦... 的而且確, 有時行過tst同csb都會見到一d第一眼就覺得好型的人, 但... 有幾多個真係內裏都ok呢... 而且, 我相信咁"外型"法, 要用好多錢買名牌呢(個人覺得名牌不多不少真係著得靚d)。

P.S. 今日係公司真係無野做, 先咁無聊打篇咁o既騎呢野

<<最近睇的戲>>

呢排keep住都有睇戲, 短評一下:

"一百萬零一夜 - Slumdog Millionaire"
好"印度" 的電影, 個人認為拍得非常真實, 故事特別, 難得一套"得獎"又好睇的電影。

"龍珠之全新進化 - Dragonball Evolution"
呢套... 如果唔係叫龍珠就make sense好多... 但唔叫龍珠我一定唔會睇... 唔係"爛"的問題, 係唔係"龍珠的問題... 例如... 悟空有高中生活仲要去溝女?

"愛情收錯風 - He's Just Not That Into You"
愛情小品, 其實內容都幾豐富, 但好似太多角色, 又太多messages, 要用一段先時間先攪清楚邊個打邊個, 想講d野又唔係好夠說服力...

"讀愛 - The Reader"
呢套戲同好多攞獎戲一樣, 都係有少少變態... 開頭有少少亂倫feel, 但後半part真係幾好睇, 好多茅盾同掙扎, 好多悔恨同無奈, 值得一看。

"天煞遇正怪怪獸 - Monster vs Aliens"
呢套戲睇3D版! 第一次, 雖然要成$90, 不過都幾得意, 都ok啦, 不過相對於Incredibles 同Wall-E, 好似真係差左少少...

Status Update

<<新電視機>>

屋企用左近十五年的電視機終於不支猝死了... 由於全家人無人對電視機有興趣/研究/昐望, 最後都係要自己去決定買咩電視, 最後買左VIERA 42" Full HD... 主要原因係:

1. 一定要Full HD, 唔要HD Ready, 因為前者抵買少少
2. 我就搬走, 所以一定要襟同有warranty, 呢部應該係made in Japan + 5yrs warranty
3. 因為識人, 所以有折, 折左好似真係幾抵

今晚嘗試去買個高清盒, 其實我無真係坐係度睇高清節目, 唔知係咪真係好唔同呢?
但事實上, 我覺得最想試的, 係用42" 電視咑機... 對, 我認我電車...

===========================================================

<<工作調動>>

風聞已久的split team消息終於發放左update, 有人要左我地, 順利的話七月有新老闆, 唔知係邊個, 唔知仲有無得加point, 唔知有無得搬office, 唔知會唔會做o既野會唔同晒... 都無得擔心, 煮到黎都係要食... 不過, 我prefer繼續而家的角色+新duty/tasks, 因為其實都幾enjoy...

要調team的同事吹水, 大家好有戒心... 都正常... 但我真係乜都唔知, 唔好誤會我有特異功能啦... 我都只係同大家一樣打份工, 都係好遲先知d消息, 仲要知得好少...

===========================================================

<<結婚相>>

終於book左台灣機票酒店, 找左數, 貧血中... 仲有一個月就要影, 又係一單大野, 希望到時天氣好, 大家又幫手祈下禱, 等一切順順利利。

其實我要求唔太煩, 影完當玩完, 又揀得返岩岩好30~40張靚的相, 之後準時ship到俾我等我有貨交俾親友, 最緊要就係全程唔駛同Carol嘈交, 就可以了。

之後會stay behind 兩日半, 要好好吃喝玩樂下先得, 因為... 仲係好累... 要抖抖...

===========================================================

<<事奉>>

黎緊會做新嘗試, 選執事... 講真, 仲係有d驚... 責任太大, 又驚handle唔黎, 累人累物... 如果真係有幸做到, 而家敬拜隊又點呢? 好難想像無左敬拜隊的生活, 好似切走左一大part... 不過, 相信神俾的恩賜, 用返出黎做回應, 係應當的... God Bless Me...

<<速寫港男>>

尋晚睇左星期日檔案, 講港男, 你問我, 我最大的感覺會係呢一集... 削d喎...

唔明點解要 label港男鍾意上網打機睇漫畫... 呢d野... 女仔都會做啦... 真係有呢d 興趣就有問題? 電車男係一個角色, 唔係一個種族, 無遺傳的... 打機睇漫畫都可以有自信, 都可以識同人social的~

唔明點解要 label幫女人拎手袋, 無point, 無conclusion... 幫女仕拎手袋, 唔係有風度咩? 如果係條街度, 見到個女的拎住一袋袋, 個男的無幫手, 唔通覺得呢個男人型咩...

陶傑講的部份, 有佢自己的睇法, 岩唔岩我唔comment喇, 但都叫有自己的一套... 訪問個女僕...21歲, 出黎扮maid... 如果我訪問佢, 我會想問做乜有書唔讀多d, 問佢點睇d電車男... 真係無乜說服力...

月入三萬VS月入八千五, 想講真係有男仔襯唔起女仔? 係的話... 唔好搵個補習女教師同電腦維修員比, 應該搵個女醫生同個睇緊急症的待業男比, 咁可以做到更無厘頭的效果...

興趣wise睇, 我都係一個電車男, 但朋友話我未至於港男... 但... 大家日常生活中真係有聽過人話人係港男? 其實港男係咪真係咁解架... 講完女講男, 呢兩集我最大的感覺係... 其實會唔會大家focus左係d價值觀唔太成熟的男男女女度呢... 如果一個有仔有女的爸爸鍾意打機睇漫畫, 佢又係電車?... 如果有一個全身名牌事業有成, 佢真係咁覺得要拎晒男人的財權?...

<<銀包。行山腰包。iPhone Dock>>

今年的生日還未到, 就收到三份禮物了~ 真係多謝各位老友~ 暫時收到的三份禮物, 都係屬於"自己唔會捨得俾錢買"的一類。但其實每件都有少故事:

先講銀包, 銀包係Carol送的~ 很喜歡, 但呢個銀包很harsh, 無散銀住不在話下, 只能入六張card兼無位放相放單, 只有在中間的一個money clip。媽看到後拿起來認真審視, 問"咁好用咩?", 乜都裝唔到。事實上, 就係貪佢乜都裝唔到, 要諗清楚到底我要放d乜野入去... 最後, 兩張信用卡, 一張八逹通同cash搶到了位置, 而現在被提名的包括百佳易賞錢小卡和另一張信用卡。攪咁多野, 其實都係想一個字: "薄"。而在再用返card holder, 但即使張銀包同card holder疊起來, 都仍然很薄呢~

行山腰包, 一個小腰包加上兩個水樽位的結構, 好不好用, 不知道, 一年用唔用到三四次都係唔知道, 所以真係唔捨得俾錢買。但每次行山又要拎一個重重地的背囊, 飲水又唔太方便, 如果行很甘還好, 但如果只係簡單三四小時的山徑, 都係輕裝上路好~ 希望可以快d用到~

iPhone Dock, 跟友人講我想要這個東西時, 佢根本不知道是甚麼, 去apple.com search, search到個四舊水連remote的dock, confirm我係唔係, 我話, $240的就ok了。友人問, "係咪有埋speaker?", "無喎", "咁有乜?","無架. 連線都要自己買, 淨係用黎charge電", "下..." 佢先明白點解我話覺得貴, 唔會自己買。但佢都會問, 點解唔買個連speaker, 貴少少但有用好多, 我問佢, 你見到幾錢, 佢話八舊幾有, 我話我有睇中左個... BOSE的... 不太懂得音響的友人明白了...

Bride Wars

終於有時間睇戲，可惜<<一百萬零一夜>>未上，只好退求其次睇<<新娘愛鬥大>>。套戲基本上都係輕輕鬆鬆，笑笑下咁。到最後又有少少嘢想表達，但礙於時間太短，感染力差少少。唯一好是高潮位有啲驚喜，又唔算求其黎個大團圓。

小弟近排的體會，擠到時間出黎拍拖睇戲，就好拿拿林睇左去... 尤其是當兩個人都越黎越午放工...

<<好的演唱會、差的位置>>

星期六晚上跟Carol去了看陳綺貞演唱會, 在買演唱會飛的一刻, 其實佢的歌我一首都唔識... 不過聽過有唔少人話佢d歌好聽, 又知佢係自彈自唱人, 最主要係唔駛排隊買飛的同時, 又可以做一個拍拖的節目, 所以就豪左兩張二百蚊飛了。

呢個幾月我都聽過下佢d碟, 睇下youtube, 覺得都真係幾好聽, 但可能因為始終係國語歌, d歌唔係好入到腦。

入到場, 發現坐山頂頂位(第二行), 佢開270度台, 但我的位置係在台背後... 東亞銀行... 你好野... 所有視覺效果都睇唔到的concert, 有幾part因為睇唔到佢個screen project左d乜, 真係唔係好知做緊乜... 好大部份時間都係睇電視... 同埋真係"聽歌"... 二百蚊的飛, 頓時覺得只值$50... 灰左...

全個concert無乜講野, 一路唱唱唱, 但無可否認, 呢個係音樂好正的concert... 隊band好勁, 陳綺貞都好勁, 嘈得黎真係幾好聽。個演唱會過左兩個鐘, 不禁同Carol講左聲"犀利", 佢真係幾勁... 把聲用得好好, 可能因為d歌係自己作, 唱出黎又幾有feel。

今次都可算係我第一次真係聽"band"的concert, 現場的感染力果然同係ipod聽無得比。雖然好多歌都應該幾舊, 但都幾襟聽。最後, 個演唱會encore左三次。

PS. 我發覺, 每個演唱會都總有一d同個歌手好唔夾的"fans"...

<<快一年了>>

不經不覺, 仲有五日就做左呢份工一年, 呢一年, 過得好快, 可能因為真係有野要做, 充實左, 又可能因為呢一年工作以外多野做, 時間過得快左, 總知就快做夠一年。呢一年, 過得幾開心。

順順利利的做緊一個自己想做的位, 唔單單做technical, 仲要出下去開會, 同人夾下野, 又要諗下d project 點proceed 落去。其實, 點解突然有呢個機會, 我都唔係好知。記得當日assign左做呢d野的唔係我, 但好突然咁, 就叫我開始做了。仲好記得老細係team meeting時突然話, "Chris, 你唔知做UAT的, 你仲會跟出去開會。", 又有一次係佢房話,"Chris會幫手出去開會, 佢都係一個vocal的人..."

再睇返, 跟左出去開會半年, 由乜野都唔識, 都識左一d 講唔到俾朋友知係乜的東東, 終於今個月試過自己單拖出去開會, 總算變得"有少少用", 不過越做越覺得, 呢個businese實在太大, 個腦要upgrade下...

黎緊, 再俾d心機, 我想升職, 因為... 成世人未升過...

<<多試一篇>>

今次用中文。
星期一晚總算找到時間做運動，游了半km水，再來二十分鐘單車，舉一陣鐵，不太累。
再唔做返多啲運動會死...

Testing Blog on iPhone

Just a short test to look and feel blogging using iPhone app... Let's see if this help...

<<今早在車上 - 希伯來書>>

12:1 既然我們有這麼多見證人，像雲彩一樣圍繞著我們，就應該排除一切的障礙和跟我們糾纏不休的罪，堅忍地奔跑我們前面的路程。
12:2 我們要注視耶穌，因為他是我們信心的創始者和完成者。他不在十字架前退縮；相反地，為了那等待著他的喜樂，他不把死在十字架上的羞辱當作一回事。現在他已經坐在上帝寶座的右邊。
12:3 想一想他的經歷。他怎樣忍受罪人的憎恨！所以你們不要灰心喪志。
12:4 你們跟罪惡鬥爭，還沒有抵抗到流血的地步。
12:5 難道你們忘記了上帝怎樣用勸勉兒子的話勸勉你們？他說：我的兒子啊，要留心主的管教，不要因他的責備而灰心；
12:6 因為主管教他所愛的每一個人，鞭打他所收納的每一個兒子。
12:7 你們要忍受管教，因為你們受管教是表示上帝待你們像兒子一樣。豈有兒子不受父親管教的？
12:8 如果你們不像其他的兒子接受管教的話，你們就不是真兒子，而是私生的。
12:9 對於肉體的父親，我們接受管教，仍然尊敬他們。那麼，對於靈性的父親，我們豈不是要更加順服，以求得到生命嗎？
12:10 肉體的父親隨著自己的意思暫時管教我們；但是，上帝的管教是為了我們的好處，要使我們有份於他的聖潔。
12:11 我們受管教的時候，悶悶不樂；可是後來，那些因受管教而經歷過鍛鍊的人能夠結出平安的果子，過著正直的生活。

<<再努力一點>>

09年一開波, 又諗下今年有乜想做... 其實上年都唔係話做左好多野, 最叻仔就係決定左結婚, 考左個自動波車牌... 今年其實好明顯要攪左結婚單野先... 但除左結婚, 仲可以/應該/諗住做乜野呢...

第一樣覺得想做的, 就係做好份工囉, 就做夠一年, 但都仲係想做多d野, 學多d野, 做好d野, 總係覺得自己仲可以再勤力一點, 努力一點。

第二樣覺得想做的, 就係學多少少音樂, 特別係結他, 都係時候突破一下, 希望真係拎到d時間出黎學啦... 時間經常比錢就要貴, 因為時間無左就係無左...

第三樣覺得想做的, 就係事奉上... 但我都唔知點講... 希望神會開路啦... 努力準備一下, 又一步一步去驗証下應唔應該做...

講返結婚, 其實好想快d結, 仲有成年, 即係仲要諗多/擔心多/準備多成年... 其實, 結婚的意義真係遠遠重要過個婚禮呢... 我覺得...