<<詞解>>

窩心: adj. 意指心像俾人窩左一野勁的, 心裏會出現強烈不安但短暫性出唔到聲的症狀。放心, 現實生活中不常遇到。但我近日有兩次窩心的感覺。

事件一, 當見到別人打機死了一次, continue, 玩第二舖時, 仍留著打第一舖時的天真想法。例子包括: 1.以為知道爆機畫面係乜樣就即係打得爆隻game。 2.只要努力打就一定打得爆機。

事件二, 今次係集體遊戲, 講team work, 為左最後可以玩得叻d, 大家努力研究一下, first draft以為ok, 黎一次rehearsal, 發覺得draft完全唔同樣... 再執返一個version 1出黎, 嗯, 幾好。落場時... 出現左verion -5....

<<東南西北>>

尋日下午出去開會, 去屯門... 去的方法係先去柴灣某巴士站搭780去灣仔碼頭, 再搭960入屯門市廣場, 再轉的士, 全程大約用左兩個鐘... 入到去開會開左三個字, 走得... 果陣係三點三... 之後搭輕鐵去友愛, 行去屯門時代廣場轉259D出黃大仙, 轉地鐵到旺角, 當時Carol放左工等緊我... 買埋套西裝先五點幾... 這一個下午... 太有型了~

由香港的東南面去西北面, 用了兩個鐘, 唔算塞車, 但要等車, 真係唔知叫唔叫快。原本無諗過個會會咁快攪掂, 原因只係因為... 原來requirement好簡單, user好合作... 呢個vender... 好野。如果vender早少少問一問d user, 根本唔駛我地入去, 雖然我又唔係好介意試下入去, 但搭巴士都幾係野, 同埋, 我係無得claim車錢的~

之後黎緊可能會去更多醫院, 諗諗下, 都真係踩勻各大區, 但... 可能全部都係由東區出發... 鬼地方...

<<終於見到皮毛>>

重申, 題目係見到"皮毛"。有新的duty, 就係出去做UAT, 即係去d醫院度同d vender同醫生試個system, 試得ok就出街。第一次做UAT, 去左聯合, 都幾有趣, 而當中最突破的就係, 我終於知我地果team做乜... 成日話我地做Clinical Information System, 一直都唔知係乜, 成日講OTMS, OTAS, OPAS, EPR....終於大概連得埋一齊了(係我個腦度~)。

原來而家做緊的東東, 真係"有用"的, 唔係一個網站, 一個e-store, 而係真係俾醫生病人用的system, 而且真正的是在information 層面。不同的人在不同的地方要得到某一種information, 當中又涉及醫院好多好多的scenarios。幾有趣, 但都幾驚...

做UAT, 順利的話可以好無野做, 去睇住人test就得, 全部ok, 無問題。但touch wood, 有問題, 就要即刻睇乜野事, 睇下邊個人做的東東有事... 換言之, 其實要對個system幾熟下, 好多時d program 仲唔係自己寫的, 真係要做下功課。

可以出去開下會, 當然幾開心, 亦都接近左我想做的事, 但面對咁大個system, 真係要俾少少心機, 俾d時間去學多d...

<<日日等>>

呢排的topic係錢, 乜都係錢, 跌市講錢, 迷債講錢, 結婚講錢, 買樓講錢, 玩樂講錢... 錢錢錢錢的。當心裏明白到"你的恩典夠我用"時, 我還是要盤點一下自己手頭上有多少"量化了的恩典"。計計計計的, 講未來幾個月, 未來幾年, cash flow, 經濟甚麼跟甚麼的, 諗完講完一大輪, 有乜可以做呢? 儲錢囉, 即係等出糧, 然後儲起佢, 覺得唔夠錢用, 努力d等, 個個月等, 每個星期等, 每次shopping等, 日日都等... 如果你發覺你儲唔到錢, 點解呀? 因為你等得唔夠努力囉~

祝各位儲錢成功~

<<感恩>>

這陣子, 常常都想起一句"你的恩典夠我用", 因為這陣子所發生的, 實在叫我不得不感恩。

先講工作, 這份工作, 幾好, 真係幾好, 幾好唔係話人工高左福利好左, 而係呢度對我黎講, 有少少家, 少少避難所的感覺。 很奇怪, 對嗎? 記得我第一份工, 有個demanding的老細, 令我精神都幾緊張下, 加上係跟銀行做野, 都幾有壓力, 成日俾人發現我地的問題, 成日要諗好多好多大話, 一個解釋一個... 做左一年多少少, 走。第二份工作, 人工好左少少, 無乜壓力, 無乜野做, 上司話想帶我上位, 上左一年, 睇左十個season的Friends, 兩個season的Heroes, 兩個半season的Prison Break, 有幾個大細少少的老細會搵我做下野, 最後走。到而家呢份, 工作有很多, 做唔晒, 乜都唔識, 但反而有d挑戰性。果陣同朋友講, 同阿媽講, d野唔識, 驚做唔掂, 咁點呀? 俾d心機做囉... 最後又叫做做得掂啦, 托賴。但呢度的工作氣氛真係幾好, 至少而家係, 全部都係斯文人, 感覺文明少少, 理性解決問題。同事們都幾岩傾, 好過第二份工, 日日食午話題都係去滾, 去飲... 總知, 做左八個月, 我會話, 真係做得幾開心。

再講屋企, 要建立家庭了... 很緊張, 但感恩的係, 仲未有野要同Carol開片, 起碼無開大片。錢唔多, 但好似都岩岩夠。仲要有得plan下有無得好少少, 對, 我們都叫有得揀。我屋企有事發生, Carol屋企有事發生, 但我地都仲有商有量, 至少叫有分享啦。再加上呢排見多左其他人的生活, 其他人的想法, 又刺激下自己, 竟然, 我少有地覺得, 其實我而家都幾好呀... 唔差唔差。

我覺得唔差喎, 識得我夠耐, 聽我成日"唉"的朋友有無覺得意外? 但係, 係真的, 我覺得唔差, 唔差到有少少平安, 有少少滿意的感覺。

這一年的生活, 很感恩。

<<睡意甚濃>>

今早凌晨四點鐘,
call機响,
覆call,
膽粗粗試check下個project,
不成功,
找同事A請教兩句,
再試check,
不成功,
找project owner同事B,
佢叫我再試,
都係不成功,
最後佢還是要自己check,
check check 下,
發現個monitoring tool本身有問題,
那時是五點三,
找鄰team 同事C,
同事C找同事D check,
六點時同事C打給我,
証實是false alarm,
返上床訓唔著,
七點負責任的同事C再打俾我,
話同事D仲fix緊,
醒晒,
七點半左右訓得著,
八點半起身,
工作了半天,
現在呢一刻,
睡意甚濃...

<<我的年代>>

昨日老闆大發慈悲, 打風提早放人, 補習學生又唔想補習, 於是決定返家食飯。回家前到HMV逛一逛, 小小的店子, 我竟然逗留了半小時有多, 一來想用$20消磨打風晚上的兩小時, 二來有些CD我想找一找看看還有沒有得賣。

我用$20買了一齣另類電影"Delicatessen", 有興趣可以問我借黎睇睇, 我跟細佬一齊睇, 過程中無乜野講, 但最後的情節都幾有趣。

之後, 搵下CD, 找找Avril, 但太貴, 沒有買; 找找"Love Actually" soundtrack, 特價$188 for 2, 但我用了十分鐘都找不到另一隻想買的; 無意間, 看到了Westlife有2 album package, 係"Westlife" + "Turnaround", 剛好兩張都是我沒有的。

$195, 話貴唔貴, 但我一想到這真是我由細聽到大的CD, 而且仲要有最正的那張"Westlife", 便買了, 反正又可以試下用張新credit card (大借口!!). 回到家, 發現盒子爛了, 有一點灰, 希望換得成。一開過來聽, 不得了, 清楚記得是中二的一年開始聽, 還記得那些前奏, 過門, 歌詞, 太好了。我覺得Westlife都可算是見証住我成長的聽歌史, 我是中二開始聽英文歌, 當年"Lemon Tree"熱播, 仲係拍緊MI1, 聽過Boyzone, Backstreet Boys, 但最喜歡的還是Westlife 和a1. 後來a1死了, Westlife 還是生存著, 現在一至兩年還是會出album.

除了Westlife, 仲有乜野音樂係屬於"我的年代"的呢? 梅姐, 哥哥都離開了, 四大天王本人覺得睇好過聽, 王菲, 陳奕迅都可算是由小聽到大... 要再找找自己年代的其他証物(玩具)先得~

I Love This Game

今日，我請了一日假，為的是參加母校的水運會，游校友接力賽。說回來，這也是我主動找學校的老師安排的，很有趣，對嗎？今年的水運會不是在九公舉行，轉到九龍仔公園，一個露天而且不是比賽用的游泳池，不打緊啦，just for fun. 見到很多舊老師，寒喧一番，有說有笑，都幾開心。

校友隊成員包括我們兩兄弟，一位跟細佬差不多年代的泳手，和一位還保持當年紀錄未被打破的猛將。我呢D老餅，返去當然係nothing，等左一大輪，影下相，吹下水，終於比賽了。老師們很俾面的介紹我們，有老師指我們是過氣飛魚，有老師更用咪大聲的說這應該是歷來最有實力的校友隊，雖然是客氣話，聽了還是暗笑了一下。

為了這個看似無聊的比賽，我針對性的在做GYM時訓練了幾次，到泳池游過一次水，其實都係為左唔好太肉酸，唔好拉柴。我和細佬分別游第一和第三棒，猛將游第四棒，比賽是很多野擔心，“我還記得怎樣跳水嗎？“，“怎麼要在一點二米深的那邊起跳“，“Oh NO~ 要游淺水游到深水，很辛苦“，臨上台的一刻，我還要特別問細佬，起跳的司令是怎樣的？一下雞聲還是兩下雞聲，哈哈，小心D好。看到隔離有學生穿波褲，心也定了少許。

要比賽了，戴泳帽泳鏡，站在跳水台前，集中精神，突然四周靜了，只想好要游好這五十米。雞聲响起，上到跳台，久遺了感覺，感覺很好。“On Your Mark...", 伏下身來準備... "WOW, 差D跌左落水... 好彩“, “Doo~~~~"

事實上，我身旁的兩線，看去真的很強，一個係半長褲，一個係長褲，一睇就知係泳隊，我的目標也只是不要輸太多而已，其他就留比其他隊友啦。結果，我游完時第三，落後大概一個身位（很不錯了），第二棒的隊友追到第二，第三棒的細佬到池時，已經是跟第一的那隊近乎平手了，“WOW~~" 開心到我～～ 雖然最後還是輸少少，但真的很痛快。

事後我問WIN的那隊，你們的第一棒是最慢的嗎？他們回答“不是～“，鬆了一口氣，我真的不大差～ 這場比賽，很無聊，但對我而言，這可能是最後一場人生的游泳比賽呢（除非我繼續回去游校友隊），我真的不想以大專賽那不知所謂的400自作為終點。而且，比賽過後，心情好了很多。昨日還掙扎著游不游好，還好，有游到。

特別鳴謝：多謝細佬陪我DIN～

<<鹹魚白菜也好味>>

昨晚, 公司有人升職請食飯, 去左一間中環的日本料理食。理論上, 係$300一位任食, 但實際上, 佢有好多唔覺唔覺得方法令你食得好唔痛快。暗包括, 你想叫三文魚刺身, 乜乜刺身, 物物刺身, 佢就會將咁多樣野加埋做一個拼盆, 變身做拼盆後, 每樣野得返三四件, 但我地係十人枱... 而且個拼盆總會加一兩隻無人想食的"甜蝦", 於是就成日有未食完的感覺。叫左野, 好耐唔黎就預左架喇, 始終你order次收越少, 佢越so, 但好耐先黎一樣野, 黎親又問你地有無order xxx, 咁無得食就會答有架啦, 咁又食左d唔係最想食的野... 唉...都唔知攪乜。

我向來無乜坐位運(運???), 今次, 我坐左係清潔阿姐對面(對, 真係office的清潔阿姐), 係邊位(即係有一邊無人), 我大半晚都靜坐...另一面講野, 自己又聽唔到, 自己講野, 都唔知講乜野好... 好嘈的環境(飲茶level), 坐左一個鐘, 我就開始呆滯了, 食慾都下降埋。加上自己果枱d人個個都話"好飽", "無乜野想食"... 見到另一枱同事, 亂up一餐, 大吃大喝, 最後仲叫埋火鍋, 真係百般滋味... 最後借口話未飽, 走埋過果枱食火鍋先叫餐飯有大笑過下咁食呢一餐。

事實上, 我對食要求唔太高, 唔好難食就ok。當然, 要求唔高得黎都會識分好食同唔好食, 正同唔正。食飯, 好又一餐唔好又一餐, 但餐飯做左d乜先。係聚舊飯, 就唔好唱k; 係大吃大喝一餐, 就唔好就住就住; 係食d好複雜的食, 就唔好人少少; 係無所謂, 就搵d平平地, 又傾到計的地方食啦。

終於星期五。

<<長隆之旅>>

星期一二跟教會幾位仁兄一行十人返大陸玩。行程簡介如下:

第一日: 搭車>祈福新邨unpack>食飯>水上樂園>大馬戲>晚飯>回祈福新邨
第二日: 早餐>野生動物園>祈福新邨packing>晩飯>回港

個人而言, 第一日比較好玩, 一來呢次係我人生的第二次玩水, 二來真係減到壓~ 今次都算係我少有地乜都玩晒, 不過, 其實d設施, 都唔係好"驚"o者。大馬戲, 幾好睇, 無乜悶場(雖然動物表演時我睡著了一會), 但有幾個環節都真係睇得幾興奮。呢一日算得是盡興而歸。

第二日, 去動物園睇動物, 但天氣都幾熱, 又要keep住行, 我就有少少累, 但對先天排汗系統不發達的Carol來說, 就真係熱到"講不出聲", 入左馬戲團一個鐘, 之後好似無聽佢講過野了...

總結, 未去過長隆玩的朋友, 不妨一去, 幾好玩, 不過去過一次後, 似乎幾年內不用考慮再去住。

<<好人的審判>>

<<奧運有感 - 八金>>

今屆奧運, 一定係我最投入的一屆, 幾乎每晚都緊貼賽事精華, 自己覺得自己可以見証到咁多"歷史", 實在有幸。當中最舉世震驚的當然係"匪而所思菲比斯"的八金夢完。好多人覺得菲比斯好"屈機", 乜都俾佢win, 無乜大驚喜。在於游過下水的我黎講, 當然又有另一番體會... 八金, 難就難在八個都金, 八個"第一", 一個"第二"都唔可以有, 因為當有一樣野慢過其他人, 你就唔夠匪而所思, 你就唔夠勁, 歷史上你的名字不會發光。呢樣野我細佬都體會過, 當三金兩個新紀錄遇上三金三個新紀錄, 人們連你的名字都不會提一下。當然, 游水本身無撞彩, 好多時比賽前都大概估到自己排第幾, 係呀, 係幾悶架。

講返八金的比賽, 一開始我便關注著自由接力和一百米蝶泳, 因為不是他(和美國隊)的強項, 如果過到呢兩關, 都無乜大問題。一百米蝶泳win第二0.01秒, 事實上, 我連第二係邊個, 黎自邊個國家都無留意 (這就是我所講的世人眼裏只有第一, 沒有第二), win左, 佢係游得最快的人。至於接力... 法國隊的最後一棒唔知對自己的失誤有乜睇法, 佢的拉柴成就了美國隊0.02秒的勝利。咁就八金, 我有生之年見到有人八金。

<<電視精>>

這陣子睇左好多電視, 多到一個地步係... 多過Carol... 睇的電視有奧運, 有溏心, 連貓狗都睇左個ending, 自己都覺得不可思議。

睇貓狗一劇, 只覺此劇極度病態, 人同貓狗同時發生多角戀, 都唔同佢計成日close up d貓狗幫佢地配音喇, 成個結局篇一味煽情, d情節荒誕得O咀, 真的不得不服無記編劇的天馬行空, 細佬話, 呢套野想講的是:"如果貓都可以愛上狗, 乜野奇蹟都可以發生。" 唔緊要睇, 睇完鬧下笑下, 就算啦。

又黎溏心, 比上一集更浮誇, 集集都用d好深的字句, 如果真係俾人咁樣鬧, 可能呆足半日都未明人鬧乜。好笑的係, 咁偏激的劇集反而令我想繼續睇, 睇下佢有幾偏激, 關菊英有幾乞人憎, 荷媽eq有幾高。雖然差唔多集集都有人爆seed, 但睇睇下都有d趣味~

It Is All Because I Don't Want To Pay

<<奧運有感 - 開幕>>

補記一下對奧運開幕禮的感想, 事實上, 我沒有看畢整個過程, 當我坐在電視機前時, 是剛剛開始運動員進場, 大概過了十五個國家/地方後, 便沒有看, 直至最後中國隊進場, 才坐回"觀眾席"。之後是傳聖火, 是點聖火, 然後是... 成龍唱歌... 完。

初段時的精彩演出, 錯過了, 無辦法, 聽講係"正到痺"同"無得頂", 希望遲d睇得返啦。事實上, 看著點聖火的過程, 我心想, 沒有旁白便好了... 那些旁述員, 應該說, 那些香港旁述員, 不是BS一通, 便是一開始就不看好中國。有些"讚"的說話, 真夠有味的, 好讓我思考了一會, 才下結論, 佢唔知自己講緊乜o者。

個人而言, 開幕禮不是"無失禮", "是揚威中外"。一個世界性的運動會在中國舉辦, 開幕禮上的表演, 失甚麼禮? 唔通有人會話中國跳d舞好"騎哩"? d 對白好"gag"? 定話中國太多人? 單從我看了的部份, 中國顯出了"聞名遐邇" 的一面 --- 人多; 再顯出左世界開始認同的一面 --- 人才。

人多, 不用多講, 近二萬名的表演者, 我相信世界上沒有地方可以做到, 信我, 一個也沒有。
人才, 張藝謀當然是當紅炸子雞, 更揚言倫敦奧運的電腦特技一定不及中國今次的好; 但, 這始終是奧運, 中國運動員, 有幾可失禮? 各大主要項目, 中國何止跟別國爭一日之長短? 爭左幾十年啦~

覺得中國今次不失禮, 只係因為他們覺得中國人這個身份比人低了一級。
覺得中國做得比預期好, 因為他們沒有期望中國做得好。
覺得中國一定要贏"一定贏"的項目, 那些人是膚淺的。

<<放假>>

昨天放了一天病假。細佬好奇的問我, "你係咪插水咋?你唔係病到返唔到工架?"。Well, 我諗唔係要病都郁唔到先請病假, 如果foresee到返多一日工會好大鑊, 都應該請啦。而尋日一起身個喉嚨仲好痛, 就應該係惡化中喇。

Send完SMS話請假, 上返床諗住訓, 訓左一陣, 響call。打電話俾同事, 打完都醒晒了... 睇完醫生, 食飯, 食藥, 三點幾諗住訓一陣, 點知真係訓一陣, 又響call, 又打電話... 之後乾跪remote返公司做左一陣野... 究竟我有無休息多左呢...

放假在家, 無乜野做, 睇下片, 睇下書, 對住間房, 好怪的感覺, but not in a good way. 我想住在一個安靜的地方, 至少唔好成日有無大吵大鬧, 樓下唔會人來人往, 而家果度, 都叫合格, 除左中銀過去一星期的熱潮令我在鬧鐘鬧前先被人聲嘈醒。我想間屋大d (每個人都應該咁想), 同埋我想間屋少d野。少d野黎講, 其實唔係要"少"d野, 而係要有用的東東先存在, 無用的東東就扔啦... 原本想趁病假, hair cut, 執房, 但兩樣野都無做到, 失敗。

<<考成點?肥左囉~>>

尋日去考車, 肥佬收場。雖然話都幾預左, 少少失望都係難免。當然, 我一向都知自己對"車"呢樣野真係唔太識, 但我又真係會覺得個師父唔係好負責任... 一個師父, 唔話你知幾時應該做d乜, 無做就鬧, 都ok, 我覺得咁係因為佢唔識教, 果d師父, 都係自己渣得叻就以為自己好醒的一類(超主觀), 又點會知道乜野係唔識, 或者知道佢真係要講俾個學生聽幾時要做乜。其他都唔多講喇, 總知主因都係自太己唔叻啦。

要排過期考車, 知道幾時考先再搵師父補鐘(如果好師父介紹, 請告訴我~), 咁呢一兩個(可能係三四個)星期就應該得閒少少, 抖一下。要考過, 又係一筆錢, 如果touch wood再肥佬, 我可能真係會放棄... 考返自動波算。

<<謝謝地>>

看見自己的calendar, 密到不可再密。這陣子, 己經沒有約太多人食飯, 只是學車加上教會, 真令我有點吃不消。一個月內學車考牌, 真的比想像中辛苦, 但都沒有辦法, 肥左的話, 也就只好補鐘再黎過。加上教會要攪工程, 要練歌, 生活突然爆炸了。晚上回到家中, 真的要打下怪, 做下gym減壓。這樣的生活維持了約一個月, 開始以來都是累累的, 訓極都唔夠, 成個人都無乜氣力同精神。

但是, 我又會想, 生活總不可以常常因為累同謝而停下來, 否則會甚麼都做不到。唯一可以做的, 俾d心機返工, 俾d心機學車, 俾d心機事奉, 俾d心機落每樣野囉。如果考到車牌, 要好好咁抖下, 玩下, 見下d friend。抖完就要俾d心機準備下個婚禮了。

<<大事件>>

最近發生在我身上的事中, 第二大的一件當然係我終於求婚了, 而更大的就是Carol答應了~
經過左一段時間的"齋諗", 終於implement左個求婚plan, 雖然有少少out-bud, 但不打緊啦, 因為係一個好開心的moment~

Engaged, 即係我們決定結婚了, 即係我地等緊結婚. 個人而言, 呢段日子都幾難過, 因為要"齋諗"更多野。"教堂"嘛, 有了目標, 但可不可以不到自己控制, 齋諗。"住邊"嘛, 又係有了目標, 但唔知夠唔夠錢, 齋諗之餘都仲要睇下樓, 儲下錢。如果大家有乜野suggestions, 無任歡迎~

朋友話呢個係2009年大project之一, 我覺得係人生的大project之一, 但我的project goal很簡單。不用大華麗, 不用太特別, 只想舒舒服服, 開開心心, 順順利利的娶到個老婆返新屋一齊生活就可以了。

<<熱血事件兩則>>

近日我們中國有盛事, 也有悲劇。當中, 我從跟我不大相熟的電視機中得知了兩段小插曲。

插曲一:
為了北京奧連的場館"鳥巢"能及時落成, 有一倍小技工四年來沒有回到家鄉, 也沒有放假, 每天工作十二小時以上。看見鳥巢將近完工, 他很感動, 更很高慶他"有幸"可以在奧運期間作場地支援的一份子, 見証著歷史的一刻。

插曲二:
有一位在四川地震發生後被困超過140小時的礦工被拯救隊救出, 並及時送到醫院接受治療, 生命沒有大礙。他被送往醫院的方法是, 由一小隊解放軍一拿著擔架步行八小時把他送往較遠離災區的醫院。

願主祝福中國大陸。

<<世界真係細>>

黎左呢度做野岩岩好兩個月, 最近幾個星期見返上一份工同前一份工見過的兩位女仕。前一份工的一份當年是一個sales manager, 有聞呢位女仕當年係高層親屬, 但同全公司人唔妥, 最後走左。今次係見係因為佢黎我地team sell 一個product, title仍然係sales manager, 但間公司應該俾當年果間professional 好多。過程中, 講野的tone仍然係吹水唔抹咀的sales tone. 仍然係會突然插咀講野, 仍然係唔太顧儀態。

第二位, 一個唔記得係sales定marketing 的directer, m$的朋友, 上一間公司時同佢見過五六次面, 感覺嘛... 講野好煩... 令人好炆... 講唔出原因... 今次見佢係在一個seminar上, 佢好似認得我, 但無相認。seminar 最後一part 俾左佢, 都俾佢ko左... 我同事的comment係, 唔知個女人做乜... 唔知佢想講乜, 唔informative。

我無回應佢的comment, 我果刻的體會係, 我地原來都在一個很細的世界上為生命奮鬥著。

<<睡魔來襲>>

唔知點解, 黎到呢度返工之後, 每日都總有一段時間要同睡魔打仗... 好得人驚... 歷時約一個至個半鐘不等, 而家又打緊了, 不能自控的"鐘"眼訓... 就快撞到個mon了... 昨晚明明己經一覺訓天光, 又搭左一程地鐵, 咁落去真係唔掂, 大家有無方法可以救救小弟呢?

<<歡笑過後>>

作天拖著疲累的身軀回到教會, 領敬拜, 聽道, 之後幫豪影了幾張畢業相(效果真的不大好, 抱歉~ 我真的很怕在沙崙聚會室影相)。食過午飯, 便開始了跟小龜的聯合生日派對~ 一開始的節目, 是去買東西, 即係"買餸", 對我來說, 這部份己經是派對中了, 因為都有一班人一齊去買嘛。

把東西運送到豪家後, 便開始hea了, 其實那時真的很累, 累得說不出話來, 還好, 之後的活動很靜態, 一班人, 各自找一個位坐下, 睇戲。睇<>, 都算幾好睇, 很多創意, 諗頭, 係一套睇完都幾開心的戲。接著大家打了一陣wii, 開飯。

開飯前送禮物~ 竟然兩份禮物都是小相機~ 很有趣, 同一serious的東東, 很喜歡, 今天己經拿了來玩, 不知效果如何。飯後吹水少不了, 但之後還學了新card game, 難得難得~

多謝咁多位好友/新朋友/來不了的朋友~ 最後嘛, 最後就是今天好累, 又係作病狀囉。

一早跟supervisor傾了一陣, 到底佢地想我做乜呢...?

<<第七天>>

新工作開始了七天, 裝了七次Red Hat Enterprise 4.0. 飲了三餐茶, 食了三餐tea.
頭上有兩個API, 一個demanding + technical, 一個無乜點講野, 但似乎較"好人".
知道多左一d福利, 又多了一點東西想想.
看了很多document, keep住同google和oracle握手, 但仲未成功咁install oracle.
今年的計劃, 可能再加了一樣, 但還得想想看, 始終唔想打擊自己.
繼續與很久沒有見面的朋友食飯, 大家都大了, 大家都很能幹, 有自己的一套.

新工以來, 不繼失眠, 久久不能入睡, 有壓力? 還是太心急要逹成目標?
我應該如何取捨目標的先後次序呢? 還是再多問幾個朋友看看吧~

Last Day Confirmed

2008-02-06, 如無意外, 會是我在這間公司的 last day. 算一算, 我在這公司工作了一年四個月多少少, 不算長時間, 尤其是比較起這裏的同事(比我遲入職的另計), 實在是很短。在這裏, 看到了一些前一間公司很不到的東西, 很多的政治, 很多的是非, 更領教到八婆的本事, 大學生與非大學生的不同, 東南亞國家的工作模式, 中環的午餐去處問題, 甚麼是看得見的有錢人, 甚麼是看不見的有錢人.... 簡單的一句, 在這裏我看到了很多跟我不同類的人, 唯一跟我比較接近的, 恐怕是較新的一位同事, 一位讀computer science的fresh graduate programmer.

記得上一次跟senior做appraisal時, 佢講左一堆類似咁樣的野:
"... 同事覺得你做佢地d野唔上心, 成日唔小心, 跟唔足... 的而且確, 我都覺得你做management比起做coding好, 醒目仔嘛, 同事對的睇法都幾似開頭其他人對我岩岩黎果陣的睇法, 醒目仔嘛, 咪唔想做無聊野囉... 你有presentation skill, 諗野都幾強, 其實我都想你幫我諗下點改好d野, 再俾其他人去做coding, 所以你都真係可以幫下我諗下囉... 唔知點解, 大老細係幾睇你的, 都明既, social skill比其他人好少少, 又知老細要乜, 俾心機啦, 唔好浪費左一些其他人無的特質..."

聽完之後, 都唔開心左幾耐, 女朋友話其實都算係讚賞, 當然佢都係偏向錫住我的。但我在意的是, 到底我做其他人野有幾唔上心, 記憶之中, 這裏的工作模式係有人會突然叫你follow一d未聽過的野, 之後要花好大的力氣去問去估發生緊乜事, 然後就做... 咁做野法, 點會唔跌跌漏漏, 加上本身我同佢地, 真係唔係好岩傾, 咁佢地感覺又打左折扣, 明白的。我亦同意, 我真係唔係一個小心的人, 尤其是d細微野, 唔小心得幾緊要, 可能我都係唔適合做全職programmer, 事實上, 我亦在避免做全職programmer.

又記得同老細resign時, 只係同佢傾左3分鐘, 可能因為佢的開場白, 我由無野講變成唔駛講, 都好:
"... 我諗你講得都走硬架啦? 都唔駛點留你架啦? 第二個的話都仲好少少, 不過係你, 我估都無乜得攪架喇... personally, 我唔想你走的, 呢個係肯定的, 不過都無辦法啦..."

結果只係問返一d幾時黎, 果邊人工大約幾多之類的問題, 又一兩句問下我諗住點handover d野。唔係攪gag, 我handover真係有一手, 好快會另被take over的人明白做緊乜~

呢個老細, 係一個好人, 一個肯搏肯做的老細, 亦會睇住班細的, 希望我有一日都會做到一個好老細。

新工作環境, 想像不到, 到呢一刻我都未sure自己去邊度返工, 係咪返星期一至五, 又要面對一班新同事, 這一項真的不是我的強項。希望順順利利吧~

<<2008年的第一篇blog>>

新的一年, 總會有新一年的計劃。今年的生活相信不會比去年泛味, 我也希望今年的生活來得更精彩和有意義。對於計劃, 我總不能說自己是一個很有計劃的人, 但我會是常常胡思亂想的人。空想一下怎樣去玩, 未來可以做些甚麼, 有甚麼方法可以爭取到一些事物...

說回今年的"空想", 頭兩個月會有工作的轉變, 希望到時能適應得來吧。上半年希望可以完成一些較大的事件, 包括講左三年的學車。未來六個月應該蠻充實的, 不過我總覺得, 充實, 忙碌不是問題, 但要值得。另外今年還得適應新的隊工配搭呢~

滿有期待和興奮的一年開始了~